Putin përgëzon presidentin Trump për fitoren: Jam gati të flas me të, burrë i guximshëm

Presidenti rus, Vladimir Putin ka thyer heshtjen për fitoren e Donald Trump dhe është shprehur se ai është gati të flasë me presidentin e zgjedhur të SHBA-së. Një ditë pas fitores së Trump, ai tha se ishte i impresionuar nga sjellja e tij pasi i mbijetoi një atentati në një tubim në korrik.

Ai e përshkroi Trumpin si një “burrë të guximshëm” dhe se çdo ide për lehtësimin e përfundimit të krizës në Ukrainë meriton vëmendje. Putin uroi Trumpin pas një fjalimi që mbajti gjatë një konference ndërkombëtare në Soçi në Detin e Zi.

“Dua ta shfrytëzoj këtë mundësi që ta uroj atë për zgjedhjen si president i Shteteve të Bashkuara të Amerikës”, tha Putin. I pyetur nëse është i hapur për të mbajtur bisedime me Trumpin, udhëheqësi rus tha: “Jam gati”.