Refugjatët, janë harruar në Greqi

Refugjatët në Greqi, janë lënë në harresë. Ky shqetësim ka ardhur nga Bashkimi Europian, i cili i ka kërkuar shtetin helen që të përshpejtojë zhvendosjen e emigrantëve dhe refugjatëve drejt vendeve të tjera anëtare. Kjo lidhet me planin i cili është nënshkruar që vitin e kaluar për të lehtësuar presionin mbi shtetet që përballojnë në vijën e parë krizën e emigrantëve.

Janë 160 000 refugjatë që duhen të zhvendosen drejt Europës qendrore përgjatë dy viteve por deri tani më pak se 4 000 njerëz janë larguar nga Greqia dhe Italia, ndërsa shumë shtete anëtare të BE-së ngurrojnë të mirëpresin refugjatët azilkërkues.

Janis Muzalas, ministër i Emigracionit, tha: “Në këtë moment ne kemi 7 000 njerëz të gatshëm për t’u zhvendosur dhe nuk kemi asnjë përgjigje nga shtetet anëtare të Bashkimit Evropian, të cilat janë të detyruara t’i pranojnë ata. Për këtë arsye ne kërkojmë që ky hendek të plotësohet”.

Ministri grek i Emigracionit, Janis Muzalas, i cili ka deklaruar se do të nisë një turne diplomatik në shumë shtete anëtare të BE-së për të diskutuar në lidhje me këtë çështje, ka bërë publike edhe disa të dhëna shokuese nga regjistrimi i rreth 58 000 refugjatëve që ndodhen në Greqi.

Kështu, prej 27 600 të atyre që kanë përfunduar kërkesën për azil, gati gjysma (46%) janë fëmijë, ndërsa gjithsej fëmijët e pashoqëruar janë rreth 1220. Nëse nuk do të ekzistonte marrëveshja e BE-së me Turqinë në Greqi do të kishim edhe 180 000 emigrantë të tjerë, ka theksuar ministri grek.