Rënia në sondazhe, Melonin drejt zgjedhje të hershme?

Kryeministrja italiane, Giorgia Meloni po shqyrton mundësinë e mbajtjes së zgjedhjeve të përgjithshme që në prill të vitit 2027, disa muaj përpara afatit ligjor që përfundon në fund të atij viti.

Meloni druhet se mbështetja e saj në opinionin publik mund të bjerë sa më shumë të vonohet procesi zgjedhor. Një tjetër shqetësim është se një qeveri e re e dalë nga zgjedhjet e vona do të kishte pak kohë për të miratuar buxhetin e shtetit brenda afateve të përcaktuara.

Kryeministrja përballet me sfida politike që prej humbjes së referendumit për reformën në drejtësi në muajin mars, një zhvillim që çoi edhe në largimin e tre zyrtarëve të qeverisë së saj. Ndërkohë, partia e ekstremit të djathtë “National Future” ka fituar terren në sondazhe, duke e akuzuar kryeministren se po ndjek politika tepër centriste.