Rritje shqetësuese e përdorimit të antibiotikëve në industrinë e mishit në SHBA

Përdorimi i antibiotikëve në prodhimin e mishit në SHBA u rrit me 16% në vitin 2024, duke shënuar rritjen më të lartë që kur qeveria filloi të gjurmonte të dhënat. Ky raport federal thekson se rritja përfshin antibiotikë “të rëndësishëm mjekësorë” që përdoren edhe te njerëzit, duke ngjallur frikën e një shtimi të “superbaktereve” rezistente ndaj antibiotikëve. Këto patogjenë, të vështirë për t’u trajtuar, tashmë sëmurin miliona njerëz çdo vit dhe mund të shkaktojnë rreziqe të tjera shëndetësore, përfshirë kancerin.

Kjo rritje vjen pavarësisht përpjekjeve federale për të frenuar përdorimin e antibiotikëve dhe zotimeve të industrisë për ta reduktuar atë. Pas një rënieje të paprecedentë gati një dekadë më parë, përdorimi i këtyre ilaçeve ka shfaqur një tendencë rritëse. Ndërsa përdorimi te pula dhe gjeli i detit u rrit ndjeshëm, nivelet aktuale mbeten poshtë pikut të vitit 2015. Megjithatë, rritja te gjedhët dhe derrat është më shqetësuese, pasi ata përbëjnë gati 85% të të gjithë antibiotikëve të përdorur në prodhimin e mishit në SHBA.

Ekspertët si Steve Roach nga Food Animal Concerns Trust theksojnë se fermat industriale shpesh heqin dorë nga reduktimi i antibiotikëve për arsye ekonomike, duke i përdorur ato edhe për nxitjen e rritjes së kafshëve. Ai shton se është më e lehtë të jepen antibiotikë sesa të sigurohen kushte të shëndetshme në ambientet masive të rritjes. Rritjet ndodhin edhe pse prodhuesit e mishit rritën më pak gjedhë dhe gjela deti në 2024.

Administrata e Ushqimit dhe Barnave (FDA) rregullon antibiotikët në blegtori, por ka pak shenja ndryshimi nën administratën aktuale. SHBA regjistroi mbi 2.8 milionë infeksione rezistente ndaj antibiotikëve dhe 35,000 vdekje në vitin 2024, me punëtorët e industrisë, fëmijët, të moshuarit dhe personat me sëmundje kronike më të rrezikuar. Kestrel Burcham nga Cornucopia Institute thekson se mbetjet e dozave të ulëta në mish mund të ndikojnë mikrobiomën e zorrëve të njeriut. Edhe pse FDA kërkoi ndryshime në etiketa në 2013 për të ndaluar përdorimin për rritje, zbatimi është i diskutueshëm dhe ekziston një boshllëk ligjor që lejon përdorimin për parandalimin e sëmundjeve, gjë që është më e lirë se mirëmbajtja e kushteve sanitare. Zgjidhja më e mirë për konsumatorët është blerja e mishit dhe produkteve të qumështit organikë, pasi etiketa “pa antibiotikë” nuk ka një përkufizim ligjor rigoroz.

Marrë nga The Guardian US