RUSI – Kremlini fton Obamën në 70-vjetorin e Luftës së Dytë Botërore

Moska ftoi presidentin amerikan, Barack Obama si dhe shumë shefa shtetesh për të përkujtuar në maj 70-vjetorin e fitores së aleatëve në Luftën e Dytë Botërore, njoftoi sot një këshilltar i Kremlinit.

“Sigurisht”, deklaroi me seriozitet Juri Uçakov si përgjigje ndaj një kërkese mbi dërgimin e një ftese për presidentin amerikan.

“Lista e të ftuarve është përpunuar duke u bazuar në listën e përvjetorit të fitores. Sigurisht që ne ftojmë të gjitha vendet e koalicionit antihitlerian, aleatët tanë, partnerët tanë më të rëndësishëm dhe më influencë si dhe ato që përbëjnë vendet e BRICS-it”, theksoi ai.

Sipas Uçakovit, lideri koreanoverior Kim Jong Un mund të jetë gjithashtu i pranishëm në Moskë me rastin e këtyre përkujtimeve që pritet të zhvillohen më 9 maj, pasi edhe atij i është dërguar një ftesë.

Çdo vit, Rusia feston fitoren e Aleatëve në Luftën e Dytë Botërore të 9 majit, pasi kapitullimi u nënshkrua më 8 maj në mbrëmje në Berlin, ose 9 maj në Moskë. Gjatë kësaj date çdo vit zhvillohet një paradë ushtarake në ”Sheshin e Kuq”, gjatë së cilës Moska përpiqet të reklamojë fuqinë e saj ushtarake.

Aneksimi i gadishullit ukrainas të Krimesë dhe konflikti i përgjakshëm mes rebelëve prorusë dhe forcave qeveritare në lindje të Ukrainës ka shkaktuar krizën më të rëndë në marrëdhëniet mes Rusisë dhe perëndimorëve që prej Luftës së Ftohtë.