Rusia në alarm, një i prekur në administratën e Putinit

Duket se Rusia nuk është e qetë pasi një person në administratën e Presidentit Vladimir Putin është i infektuar me Covid-19. Lidhur me këtë situatë, qeveria ka vendosur se masat që janë marrë për të luftuar virusin vdekjeprurës, do të shpërndahen në të gjithë vendin. Numri i të prekurve është rritur me një të tretën brenda 24 orëve, duke e çuar totalin në 1036. Katër persona kanë vdekur deri tani.

Nga ana tjetër, Kremlini thotë se po merr masa për ta ndaluar përhapjen, pasi u prek edhe një pjesëtar i administratës. Personi nuk ka kontaktuar me Putinin por zyrtarët rusë kanë parapëlqyer të mos e identifikojnë. Moska do t’i mbyllë të gjitha lokalet dhe restorantet këtë fundjavë, bashkë me dyqanet, përveç atyre që shesin ushqim dhe ilaçe. Ndërsa fluturimet janë anuluar deri më 5 prill.

Numri i të infektuarve në të gjithë botën tani është më shumë se gjysmë milioni, 558.000 të prekur. Të vdekurit janë 25.251. Spanja ka lënë pas Kinën për numrin e të vdekurve, duke u bërë e dyta në botë pas Italisë. Të dyja vendet e Europës Jugore kanë nivelin më të lartë të vdekshmërisë në këtë pandemi.