Senati e shpalli të pafajshëm, demokratët nuk heqin dorë kërkojnë ngritjen e një komisioni hetimor

Demokratët nuk do e lënë ish-presidentin amerikan, Donald Tramp, t’i shpëtojë përgjegjësive për revoltën e 6 janarit.

Ish-shefi i Shtëpisë së Bardhë fitoi në fundjavë pafajësinë për akuzat se ishte ai shkaktari i trazirave të asaj dite.

Por shumica aktuale thotë se nuk pajtohet me verdiktin ndaj do të ngre një komision të pavarur për ta hetuar në hollësi.

Nensi Pelozi, kryetarja e demokratëve në Dhomën e ulët të Kongresit, tha se komisioni do të ketë të njëjtin format si ai i ngritur gati 20 vite më parë, për sulmet e 11 Shtatorit.

“Duhet të dimë të vërtetën e asaj që ndodhi, faktet dhe shkaqet, nëse pati ndërhyrje në transferimin paqësor të pushtetit dhe si reagoi policia e Kapitolit dhe organet e tjera ligjzbatuese,” theksoi Pelozi në një letër drejtuar ligjvënësve.

Disa senatorë republikanë po ashtu e kanë mbështetur idenë e një komisioni të pavarur hetimor.

E shtuna përmbylli gjyqin politik për ish-presidentin Tramp, i vënë nën akuzë për herë të dytë si asnjë kryeshtetar tjetër në historinë e Amerikës.

Senati nuk i bëri dot dy të tretat e nevojshme për ta dënuar, ndërsa 74-vjeçari reagoi duke thënë se i gjithë procesi kundër tij kishte qenë i padrejtë, një gjueti e madhe shtrigash.

Gjyqi politik pasoi rebelimin e simpatizantëve të tij pasi republikani Tramp humbi zgjedhjet presidenciale të 3 nëntorit.