SHBA, bien të ardhurat dhe shpenzimet – Të dhënat sugjerojnë ngadalësimin e ekonomisë në 2019

Të ardhurat personale në Shtetet e Bashkuara të Amerikës ranë për herë të parë në më shumë se tre vite, gjatë janarit, ndërsa shpenzimet konsumatore ranë me hapin më të shpejtë që nga shtatori i vitit 2009. Të dhënat sugjerojnë se ekonomia më e madhe në botë do të realizojë një rritje të dobët ekonomike, gjatë tremujorit të parë të këtij viti.

Gjithashtu, edhe parashikimet për ekonominë ishin të zbehta, pasi aktiviteti i fabrikave preku nivelin më të ulët në dy vite, gjatë shkurtit, ndërsa kompanitë raportuan rënie të porosive të reja dhe të punësimit.

Sipas analistëve, ekonomia amerikane e ka humbur vrullin që në fund të vitit 2018 dhe rrit mundësitë që Rezerva Federale të mos shtrëngojë politikat monetare gjatë këtij viti.

Ekonomia po e humb vrullin edhe për shkak se po zbehen efektet e paketës së uljes së taksave dhe rritjes së shpenzimeve qeveritare, prej 1.5 trilionë dollarë.

Gjithashtu, edhe lufta tregtare mes Shteteve të Bashkuara dhe Kinës, interesat më të larta dhe paqartësitë e Brexit, kanë thënë efekte negative. Departamenti i Tregtisë tha se të ardhurat personale ranë me 0.1% në janar, rënia e parë që nga nëntori i vitit 2015.

Ndërsa pagat u rritën me një hap të moderuar prej 0.3% në janar, pas rritjes me 0.5% në dhjetor.

Në anën tjetër, shpenzimet konsumatore, që përbëjnë rreth 2/3 e aktivitetit ekonomik në SHBA, ranë me 0.5% në dhjetor, rënia më e madhe që nga shtatori i vitit 2009.