SHBA: Los Anxhelos u ofron rezidentëve të saj testim falas për Covid-19

Los Anxhelos do tu mundësojë të gjithë rezidentëve të saj kryerjen e testit të COVID-19 pa pagesë, duke u bërë qyteti i parë i madh në SHBA që ndërmerr këtë hap.

Kryetari Eric Garcetti bëri njoftimin vetëm disa orë pasi Los Anxhelos regjistroi numrin më të lartë ditor të rasteve të reja me Covid-19.

Deri më tani, një pjesë e punonjësve dhe ata që shfaqnin simptoma mund të merrnin teste për shkak të mungesës së kompleteve.

Qarku i Los Anxhelos aktualisht përbën pothuajse gjysmën e rasteve të konfirmuara të koronavirusit në Kaliforni. Shteti deri më tani ka raportuar mbi 48,000 raste dhe më shumë se 1.900 viktima.

Ndërkohë SHBA është vendi më i prekur në botë nga Covid-19 me mbi 1 milion të infektuar dhe rreth 62 mijë viktima.