SHBA mund ta kishte sulmuar me armë bërthamore Afganistanin

Pas sulmeve terroriste në New York dhe Washington, më 11 shtator të vitit 2001, Amerika kishte shqyrtuar mundësinë e një sulmi me armë bërthamore në Afganistan.

Kjo është deklaruar nga zyrtari i lartë gjerman, Michael Steiner, në një intervistë dhënë revistës gjermane, “Der Spiegel”.

Steiner, që ka qenë shef i UNMIK-ut, është aktualisht ambasador gjerman në Indi, ndërsa në vitin 2001 kishte qenë bashkëpunëtor për politikën e jashtme dhe të sigurisë i kancelarit të atëhershëm, Gerhard Schroeder.

“Letrat ishin në tavolinë. Ata njëmend shqyrtonin të gjitha mundësitë”, ka thënë Steiner, duke konfirmuar se edhe opsioni bërthamor kishte qenë mes opsioneve.