SHBA refuzon kërkesat e Rusisë për Ukrainën

Sekretari Amerikan i Shtetit, Antony Blinken thotë se SHBA-ja nuk do të bëjë asnjë lëshim mbi kërkesat e Rusisë për Ukrainën dhe NATO në një përgjigje paraqitur Moskës këtë të mërkurë.

Rusia kërkoi garanci që NATO të mos pranojë kurrë Ukrainën dhe vende të tjera ish-sovjetike si anëtare të aleancës ushtarake. Moska kërkoi që NATO të tërheqë trupat që ka aktualisht në vendet e ish-bllokut sovjetik.

“Nuk ka asnjë ndryshim, nuk do të ketë asnjë ndryshim”, ka deklaruar Blinken në përgjigjen ndaj Rusisë.

Përgjigja i është dorëzuar zv.ministrit të Jashtëm rus, Alexander Grushko. SHBA nuk e ka bërë publike përgjigjen, por thotë se kërkesat kryesore të Rusisë janë të papranueshme.