Mbi 200 të vdekur e rreth 1300 të zhdukur është deri tani bilanci i përmbytjeve katastrofike në Nepal, ndërsa viktima raportohen edhe në Kinën fqinjë.
Pati pështjellim lidhur me arsyen e fatkeqësisë, por të dhënat e fundit tregojnë se mumnd të ketë qenë shembja e një akullnaje në zonat e larta malore që shkaktoi një rrëshqitje masive toke dhe më pas vërshimin e furishëm ku uji u bashkua me baltë e shkëmbinj.
Sipas Institutit Gjeologjik të Shteteve të Bashkuara (USGS), ngjarja u regjistrua fillimisht si një tërmet me magnitudë 4,4, por analizat e mëtejshme të valëve sizmike treguan se energjia sizmike ishte krijuar nga një rrëshqitje dheu dhe jo nga një tërmet tektonik. Mes të zhdukurve janë edhe më shumë se 300 turistë, përfshirë vizitorë nga Gjermania, SHBA-ja e Spanja.
Edhe disa shtetas të Koresë së Jugut, të cilët punonin në një hidrocentral në atë zonë, rezultojnë të zhdukur, raportoi agjencia e lajmeve Yonhap, duke cituar Ministrinë e Punëve të Jashtme në Seul. Sipas autoriteteve, nga katastrofa janë shkatërruar fshatra të tëra, ndërsa janë dëmtuar rrugë, ura dhe centrale elektrike.
Disa autostrada dhe rrugë kryesore janë bllokuar. Videot ku shihej sesi masa të mëdha uji rrëmbenin shtëpi të tëra, si dhe ndërtesa të zhytura në baltë, u përhapën me shpejtësi në internet. Sipas shkencëtarëve, rajoni i Himalajeve, ku bën pjesë edhe Nepali, po ngrohet më shpejt se pjesa tjetër e botës. Si pasojë, reshjet e shiut në këtë zonë po bëhen më të shpeshta dhe akullnajat po shkrihen gjithnjë e më shpejt.
