Shifrat e fundit alarmante, pse Turqia mund të bëhet një pikë e nxehtë e Covid-19

Që nga shpallja e rastit të parë koronavirusit tre javë më parë, Turqia ka regjistruar një nga trajektoret “më të thikta” të rasteve të reja në botë, mes frikës se mund të bëhet një pikë e nxehtë e pandemisë.

Siç shkruan Al Jazeera, rritja e shpejtë e rasteve, 18.135 infeksione të konfirmuara dhe 356 vdekje deri në orët e fundit të së enjtes, kanë bërë që Turqia të kapërcejë shtete të tjera të G20 si Koreja e Jugut dhe Kanadaja që raportuan raste të virusit javë më parë.

Kjo gjithashtu ka bërë turqit të pyesin nëse vendi mund të ndiqte rrugën e Italisë, e cila ka regjistruar më shumë se 110,000 raste.

“Turqia ka shkallën më të lartë të përshpejtimit për rastet”, tha Caghan Kizil, profesor i asociuar i neuroshkencës dhe gjenetikës në Asociacionin Helmholtz në Qendrën Kërkimore Gjermane .

“Kjo për shkak se lëvizja sociale nuk ishte e parandaluar. Nëse e shohim Kinën, ata ishin të suksesshëm sepse identifikuan pacientë asimptomatikë të cilët nuk po shfaqnin shenja të infeksionit. Pas mbylljes në Wuhan, numri i rasteve të shkaktuara nga njerëz të infektuar të padokumentuar ra në mënyrë të konsiderueshme”.

Ndërsa Esin Senol, një profesoreshë e sëmundjeve infektive në Universitetin Gazi në Ankara, theksoi se Turqia tani ka parë numrin e dhjetë të rasteve në botë dhe është një nga vendet me rrezik më të madh.

“Duket se është përhapur shumë kohë para se të raportohej rasti i parë, për shkak të udhëtimeve në Evropë, Iran dhe Umrah”, tha ajo, duke iu referuar haxhit mysliman në Arabinë Saudite.

Kufizimi i testimit për ata që kohët e fundit ishin jashtë vendit në ditët e para të shpërthimit në Turqi gjithashtu lejoi që virusi të përhapet, shtoi Senol.

Ndërkohë, po sipas Al Jazeera, të enjten në mbrëmje, ministri i Shëndetësisë, Fahrettin Koca njoftoi 79 vdekje të reja.

Megjithëse shifra është shumë më e ulët se numrat e parë në ditët më të këqija në vende si Italia dhe Spanja, ku numri i të vdekurve ditorë shpesh ka kapërcyer 800 vete kohët e fundit.

Në një konferencë për shtyp të mërkurën, Koca zbuloi për herë të parë natyrën e përhapjes së shpërthimit në të gjithë Turqinë, duke treguar se 60 për qind e rasteve ishin raportuar në Stamboll, qendra tregtare e vendit, e cila përbën një të pestën e popullsisë së Turqisë.

“Nëse shkojmë në normën aktuale, numri i rasteve tona do të jetë 300,000 brenda 10 ditësh”, citohet të ketë thënë Mehmet Ceyhan, kryetari i Shoqatës së Sëmundjeve Infektive të Turqisë.