Shqiptarët në Gjermani grabisnin ‘ar të bardhë’ për ta shitur në Kinë

Një grup i organizuar shqiptarësh ka plaçkitur pluhur qumështi nëpër barnatoret në Lauenburg të Gjermanisë, për ta stërshitur në tregun kinez.

Sukses spektakolar i hetimeve të cilat kanë çuar deri në Kinë: Daniel Stephan nga stacioni policor në Schwarzenbek dhe kolegët e tij në Hamburg e Bremen, falë  hetimeve të përbashkëta, kanë zbuluar një grup të rrezikshëm e të organizuar profesionalisht.

Ata kanë arrestuar gjashtë shqiptarë, të cilët kanë qenë të specializuar për të plaçkitur artikuj ushqimorë për foshnje të llojit “Aptamil”, shkruan “Schleswiger Nachrichten”, përcjellë albinfo.ch. Vetëm në rrethinën e Lauenburgut, shqiptarët e moshës prej 19-26 vjeçare, në 12 raste kanë plaçkitur së paku 225 pako, në një vlerë prej më tepër se 4.500 euro.

“Malli i plaçkitur më pas i është dorëzuar një trafikanti në Hamburg, i cili e ka transportuar në Kinë”, shpjegon Stephan. Përmes video materialit, policia ka mundur të identifikojë qartë plaçkitësit. Plaçkitja ishte vërejtur kur nënat kanë kërkuar këtë lloj produkti për foshnjet e veta, pasi ai ka munguar. ”

`Aptamil’ dhe artikuj të tjerë ushqimorë për foshnja, në Kinë llogariten si `ar i bardhë`, që nga koha që atje plasi skandali me pluhurin e qumështit, i cili kinezët i bëri të pasigurt”, ka përfunduar Stephan. Hetimet e mëtejshme janë në rrjedhë e sipër.