Një sistem paralajmërues për Covid-19 do të lancohet nga qeveria në Angli për të gjurmuar virusin.
Sistemi do të klasifikojë nivelin e rrezikut nga koronavirusi në një shkallë nga një në pesë dhe do të rifreskohet me të dhëna. Vetë Boris Johnson, e prezanton sistemin e ri duke i përcjellë publikut edhe një slogan të ri; qëndroni vigjilentë, kontrolloni virusin, shpëtoni jetë.
Sistemi i ri do të aplikohet vetëm në Angli por qeveria po punon edhe me administratat e tjera që edhe ato të zhvillojnë sistemet e tyre. Sistemi lëshon alarme që variojnë nga i gjelbër, niveli i parë, deri tek i kuq, niveli i pestë. Ai do të jetë i ngjashëm me atë të përdorur për ta mbajtur të informuar publikun për nivelin e kërcënimit terrorist. Sipas Johnson, Anglia është aktualisht në fazën e katërt të rrezikut, por po ecën drejt fazës tre. 346 viktima të koronavirusit u regjistruan në Britaninë e Madhe të shtunën, duke e çuar totalin në 31 587.
Sipas departamentit të shëndetësisë në vend, 50 mijë teste koronavirusi janë dërguar në SHBA më herët këtë vit për zhvillim pas disa problemeve në laboratorët britanikë. Ndërkohë qeveria ka dështuar të arrijë objektivin për zhvillimin e 100 mijë testeve të përditshme, për të shtatën ditë radhazi.