Presidenti i SHBA-së, Donald Trump, u ka dërguar një paralajmërim të ashpër një numri vendesh, duke njoftuar se tarifat do të fillojnë zyrtarisht më 1 gusht 2025, pa mundësi shtyrjeje ose përjashtimi.
Në një postim, Trump tha se letrat tashmë janë dërguar në vende të ndryshme, ndërsa letra të reja do të vazhdojnë të dërgohen në ditët në vijim.
“Tarifat do të fillojnë të paguhen më 1 gusht 2025”, shkroi ai me shkronja kapitale, duke theksuar se data është e pandryshuar.
“Nuk ka pasur asnjë ndryshim në datë dhe nuk do të ketë asnjë ndryshim. Me fjalë të tjera, të gjitha paratë do të jenë të detyrueshme dhe të pagueshme deri më 1 gusht 2025, nuk do të jepen zgjatje”, sqaroi presidenti i SHBA-së, duke falënderuar qeveritë për “vëmendjen e tyre ndaj çështjes”.
