Tension diplomatik, Italia reagon ndaj Rutte për bazat amerikane

Deklaratat e sekretarit të përgjithshëm të NATO-s, Mark Rutte, për përdorimin e bazave amerikane në Itali gjatë tensioneve me Iranin kanë hapur një debat të ri mes Romës dhe NATO-s. Në një intervistë për “Fox News”, Rutte tha se rreth 500 avionë amerikanë janë ngritur nga bazat ushtarake në territorin italian në kuadër të operacionit “Epic Fury”, duke e paraqitur këtë si pjesë të mbështetjes së aleatëve për misionin amerikan.

Por autoritetet italiane e kanë kundërshtuar fort këtë version. Ministria e Mbrojtjes në Romë theksoi se Italia ka dhënë leje vetëm për fluturime me karakter teknik dhe logjistik, jo për operacione luftarake. Sipas saj, çdo kërkesë për përdorim më të gjerë të bazave nuk është miratuar. “Kur është kërkuar autorizim përtej këtij kuadri, Italia nuk ka dhënë leje”, thuhet në reagimin zyrtar të qeverisë italiane.

Çështja ka shtuar tensionet diplomatike në një moment delikat, ndërsa ish-presidenti amerikan Donald Trump ka kritikuar disa aleatë evropianë, përfshirë Italinë, Gjermaninë dhe Britaninë, për mungesë mbështetjeje gjatë përballjes me Iranin. Rutte pritet të zhvillojë një takim me Trump në Shtëpinë e Bardhë, me synimin për të ulur tensionet dhe për të sqaruar qëndrimet brenda aleancës së NATO-s.