Trump do ta ftojë Kim Jong-un në Shtëpinë e Bardhë

Presidenti amerikan, Donald Trump u shpreh i gatshëm për të ftuar liderin koreano-verior, Kim Jong Un në SHBA nëse takimi historik, i planifikuar më 12 qershor në Singapor ecën mbarë, me shpresën për një normalizim të marrëdhënieve mes dy shteteve.

Trump u shpreh gjithashtu se në takimin me liderin e Koresë së Veriut është e mundur të arrihet edhe një marrëveshje për t’i dhënë fund luftës mes dy koreve, të cilën e vlerësoi si “pjesën e lehtë” të negociatave.

Çështja kryesore që pritet të diskutohet në takimin e Singaporit është ajo e heqjes dorë të Koresë së Veriut nga armët bërthamore, por Trump pranoi se nevojitet më shumë se një takim për ta arritur këtë gjë.