Trump e lë femra më jetëgjatë në karrierën e tij

Hope Hicks, drejtoresha e Komunikimit në Shtëpinë e Bardhë dhe njëra prej këshilltareve më jetëgjata të presidentit Trump, ka njoftuar se do të dorëhiqet. Lajmi konfirmohet nga administrata “Trump”.

Ish-modelja 29-vjeçare ka qenë në krah të presidentit amerikan prej vitesh. Ajo raportohet t’u ketë thënë kolegëve se mendonte se kishte përmbushur gjithçka mundej në detyrën e saj në Shtëpinë e Bardhë.

“Nuk kam fjalë për të shprehur siç duhet mirënjohjen time për presidentin Trump. I uroj presidentit dhe administratës së tij gjithë të mirat, teksa ai udhëheq vendin tonë”, shkruan ajo në një deklaratë të shpërndarë nga Shtëpia e Bardhë, ku nuk thuhet gjithsesi se çfarë ka planifikuar të bëjë ajo në të ardhmen.

Më herët gjatë këtij muaji, ajo u përfshi në vorbullën që rrethoi ish-sekretarin e stafit, Rob Porter, me të cilin ajo kishte një marrëdhënie, por edhe ky i fundit dha dorëheqjen pas pretendimeve për abuzime fizike dhe verbale nga dy ish-bashkëshortet e saj.

Gjatë fushatës zgjedhore, Hicks shërbeu si sekretare për shtypin. Ajo e mori detyrën e kreut të Komunikimit në Shtëpinë e Bardhë gjatë muajit gusht të vitit të kaluar, pas shkarkimit të papritur të Anthony Scaramuccit.