Trump i thur lavde Grenell-it, por njofton se do të emërojë ambasador të ri në Gjermani

Presidenti i Shteteve të Bashkuara të Amerikës Donald Trump u shpreh të dielën se do të emërojë një ambasador të ri në Gjermani. Megjithatë, kjo nuk vjen për shkak të punës së dobët të Richard Grenell, ambasadori aktual i SHBA në Berlin. Por e kundërta. Trump e merr në mbrojtje dhe i thur elozhe ambasadorit Grenell, duke i besuar atij të vijojë misionin për dialogun Kosovë-Serbi. Trump u shpre se Ambasadori Grenell “ka bërë punë fantastike”.

“Do të emëroj një ambasador të ri në Gjermani. Ambasadori Grenell do të vazhdojë si i dërguar për Kosovën dhe Serbinë pasi po bën një punë shumë të mirë. Ai i njeh mirë zyrtarët. Ka bërë punë fantastike. Do ta vazhdojë. Të gjithë thonin se ishte një marrëveshje e paarritshme, por ai e realizoi. Ishte diçka shumë pozitive për këto të dyja vende”, tha presidenti duke iu referuar marrëveshjes së fundit për rihapjen e transportit hekurudhor e rrugor Kosovë-Serbi.

Ndërkohë, Richard Grenell është emëruar edhe në postin e kreut të përkohshëm të zbulimit kombëtar në SHBA, ndërsa Donald Trump po kërkon një kanditaturë për drejtor të përhershëm. Ndërkohë, nën ndërmjetësimin e Richard Grenell, Kosova dhe Serbia kanë arritur dy marrëveshje të rëndësishme mes tyre, atë për linjën direkte ajrore Prishtinë-Beograd dhe marrëveshjen për linjën hekurudhore dhe transportin rrugor mes dy vendeve.