Trump takon Orbanin, në fokus energjia ruse dhe bashkëpunimi ekonomik

Presidenti amerikan Donald Trump pritet të zhvillojë sot një takim dypalësh me kryeministrin hungarez Viktor Orban,  me fokus varësinë energjetike të Hungarisë nga Rusia dhe mundësitë për thellimin e marrëdhënieve ekonomike mes dy vendeve.

Ky është takimi i parë zyrtar mes dy liderëve që nga rikthimi i Trumpit në detyrë në janar. Orban,  një aleat i hershëm i Trumpit dhe mbështetës i politikave kundër emigracionit,  përballet me presion ndërkombëtar për shkak të qëndrimit pro energjisë ruse.

Trump ka kërkuar që vendet evropiane të ndalojnë blerjen e naftës nga Rusia,  si pjesë e përpjekjeve për të kufizuar financimin e luftës në Ukrainë. Në prag të takimit,  zyrtarë hungarezë konfirmuan se Orban do të kërkojë përjashtime nga sanksionet amerikane ndaj kompanive energjetike ruse dhe do të diskutojë mundësinë e rifillimit të dialogut SHBA–Rusi.

“Negociatat diplomatike janë gjithmonë të vështira,  por me Trumpin pres bisedime miqësore dhe të lehta,”  deklaroi Orban për mediat shtetërore.

Përveç energjisë, pritet që dy udhëheqësit të diskutojnë projekte të reja për rritjen e bashkëpunimit ekonomik në disa industri. Një zyrtar i Shtëpisë së Bardhë deklaroi:

“Populli amerikan mund të presë marrëveshje të mira nga vizita e Orbanit.”

Marrëdhëniet SHBA–Hungari janë përmirësuar muajt e fundit,  me rikthimin e Budapestit në programin e përjashtimit nga viza. Megjithatë, qëndrimi i Hungarisë ndaj Rusisë dhe lidhjet e saj të ngushta me Kinën mbeten burim tensioni me Uashingtonin dhe Brukselin.

Orban ka kundërshtuar planet e BE-së për ndërprerjen e importit të gazit rus deri në vitin 2027,  duke thelluar përplasjet me Brukselin për politikën energjetike dhe marrëdhëniet me Moskën.