U arrestua gjatë grushtit të shtetit, udhëheqësja e Mianmarit mbetet në burg

Ish-ministrja e Jashtme dhe udhëheqësja de fakto e Mianmarit, Aung San Suu Kyi, e cila u arrestua para puçit ushtarak në vend dhe së cilës i mbaroi sot afati i paraburgimit, do të qëndrojë e ndaluar deri më 17 shkurt.

Avokati i Suu Kyi-së, Khin Maung Zawm, duke folur për mediat deklaroi se klientja e tij sot nuk do të dalë në seancë gjyqësore siç ishte planifikuar.

“Sipas informacionit që morëm nga gjykatësi i rrethit, periudha e paraburgimit do të zgjasë deri më 17 shkurt“, tha ai.

Avokati Zaw gjithashtu deklaroi se ai nuk mund të takohej ballë për ballë me Suu Kyi-në, por vetëm përmes videokonferencës.

Suu Kyi u arrestua së bashku me anëtarët e lartë të qeverisë dy orë para puçit ushtarak më 1 shkurt.

Në deklaratën e bërë më 3 shkurt, ushtria e Mianmarit, e cila mori pushtetin pas grushtit të shtetit, njoftoi se Suu Kyi do të mbahet në paraburgim për 2 javë të tjera.

Gjykata ushtarake akuzoi Suu Kyi-në për “shkelje të ligjeve të importit dhe eksportit të vendit” dhe e akuzoi udhëheqësen e rrëzuar për posedimin e radiove të policisë dhe veshjeve të sjella në mënyrë të paligjshme në vend.

Grushti i shtetit në Mianmar

Ushtria e Mianmarit, pas pretendimeve për mashtrime në zgjedhjet e 8 nëntorit 2020, mori pushtetin më 1 shkurt dhe shpalli gjendje të jashtëzakonshme për një vit.

Më pas u arrestuan presidenti Win Myint dhe ministrja e Jashtme, njëherësh liderja e vendit, Aung San Suu Kyi, si dhe figura të tjera kryesore të partisë në pushtet Lidhja Kombëtare për Demokraci (NLD).

Shefi i Shtabit të Përgjithshëm, Min Aung Hlaing, i cili mori administrimin e vendit, premtoi rikthim në zgjedhje demokratike pas përfundimit të gjendjes së jashtëzakonshme, ndërsa liderja Aung San Suu Kyi i bëri thirrje vendit për të protestuar kundër grushtit të shtetit.

Kombet e Bashkuara, Bashkimi Evropian dhe shumë vende, duke përfshirë Turqinë, kanë reaguar ashpër ndaj puçit ushtarak.

Kundër grushtit të shtetit në vend filluan protesta më 6 shkurt me kërkesën për kthimin në demokraci, ndërkohë që policia në disa raste ka ndërhyrë ndaj demonstruesve, kurse ushtria ka shpallur shtetrrethim në disa qytete.