Vance tregon “çelësin” për t’i dhënë fund luftës: Irani duhet të ulë ndjeshëm pasurimin e uraniumit

Irani duhet të bëjë shkurtime të konsiderueshme në kapacitetin e pasurimit të uraniumit për të përmbushur kërkesat e SHBA-së dhe për të hapur rrugën drejt përfundimit të luftës shtatë-mujore, deklaroi në një intervistë për Reuters zëvendëspresidenti amerikan J.D. Vance. Vance, i cili ka luajtur një rol të rëndësishëm në përpjekjet diplomatike për t’i dhënë fund konfliktit, tha se çdo marrëveshje me Teheranin duhet të përfshijë reduktime reale dhe të verifikueshme të kapacitetit të tij të pasurimit të uraniumit dhe jo vetëm premtime për kufizime në të ardhmen.

“Një nga çështjet themelore është se, nëse nuk doni një armë bërthamore, pse keni nevojë për karburant të pasuruar në 60%?”, tha Vance, duke shtuar se Irani duhet të ndërmarrë “diçka të konsiderueshme” lidhur me kapacitetet e tij të pasurimit për të dëshmuar se nuk synon të ndërtojë armë bërthamore. Shtetet e Bashkuara dhe Irani kanë shkëmbyer propozime gjatë javëve të fundit, në përpjekje për t’i dhënë fund konfliktit dhe për të rihapur Ngushticën e Hormuzit, një prej rrugëve më të rëndësishme të transportit të energjisë në botë.

Presidenti amerikan Donald Trump ka hedhur poshtë propozimin e fundit të Teheranit dhe ka paralajmëruar se operacionet ushtarake mund të intensifikohen pas zgjedhjeve të nëntorit. Megjithatë, Vance tha se Uashingtoni mbetet i hapur për një marrëveshje, por kërkon lëshime konkrete nga Irani për programin e tij bërthamor. “Ne nuk do të shkëmbejmë fjalë me veprime”, tha ai.

Vance: Nuk është e qartë kush merr vendimet në Iran
Zëvendëspresidenti amerikan foli gjithashtu për pasigurinë e Uashingtonit lidhur me mënyrën se si merren vendimet në Teheran. Vance tha se SHBA-ja është në kontakt me presidentin iranian Masoud Pezeshkian dhe ministrin e Jashtëm Abbas Araghchi, por sipas tij nuk është e qartë se sa autoritet kanë ata brenda strukturës së pushtetit iranian. “Një nga gjërat që kemi kuptuar është se nuk është plotësisht e qartë se si merren vendimet në vendin e tyre”, tha Vance. Edhe Trump është shprehur në të njëjtën linjë, duke thënë se një nga problemet kryesore është mungesa e qartësisë se kush e drejton aktualisht Iranin. Teherani i ka kundërshtuar këto pretendime. Zëdhënësi i Ministrisë së Jashtme iraniane, Esmaeil Baghaei, tha se zyrtarët amerikanë e dinë shumë mirë se kush janë bashkëbiseduesit e tyre dhe si funksionon sistemi i vendimmarrjes në Iran. Sipas tij, problemi qëndron te “pozicionet kontradiktore dhe mesazhet konfuze” të zyrtarëve amerikanë.

Vance tha gjithashtu se ka komunikuar personalisht me komandantë në terren për të marrë një pasqyrë të situatës ushtarake. Ai hodhi poshtë shqetësimet për mungesa serioze të municioneve kritike dhe tha se, ndonëse forcat iraniane kanë arritur herë pas here të godasin anije tregtare në Ngushticën e Hormuzit, ato nuk kanë mundur të ndalojnë në mënyrë të përgjithshme eksportet e energjisë përmes kësaj rruge.