Von der Leyen: Në Bashkimin Europian vaksinimi kundër Covid-19 do të nisë më 27 dhjetor
Vaksinimi kundër Covid-19 në Bashkimin Europian, do të fillojë më 27 dhjetor. Lajmi u bë me dije nga presidentja e Komisionit Evropian, Ursula von der Leyen, përmes rrjeteve sociale.
“Koha për Evropën. Më 27, 28 dhe 29 dhjetor, do të fillojë vaksinimi në të gjithë BE-në. Le të mbrojmë së bashku qytetarët tanë”, shkroi von der Leyen në Twitter.
Kjo datë u tha më herët edhe nga ministri italian i Shëndetësisë, Speranza i cili tha se në Itali do të nis më 27 dhjetor dhe ai propozoi që në këtë datë të niste në të gjitha vendet e Bashkimit Europian. Edhe ministri gjerman i Shëndetësisë Jens Spahn konfirmoi më herët datën 27 dhjetor si data e vaksinimit kundër Covid-19.
Pak kohë më parë shefja e Komisionit Europian, shpjegoi se Bashkimi Europian ka portofolin më të gjerë të vaksinave potenciale ndaj Covid-19 dhe se do të ndihmojë edhe fqinjët me imunizimin e qytetarëve.
It’s Europe’s moment.
On 27, 28 and 29 December vaccination will start across the EU.
We protect our citizens together. We are #StrongerTogether#EUvaccinationdays pic.twitter.com/6VxDumysBL
— Ursula von der Leyen (@vonderleyen) December 17, 2020
