Zjarret alarmojnë Greqinë, evakuohen turistë dhe banorë në Halkidiki

Një zjarr ka përfshirë këtë të enjte zonën e Halkidikisë në Greqi, duke alarmuar autoritetet dhe turistët që ndodhen në një prej destinacioneve më të frekuentuara të vendit. Për shkak të përhapjes së flakëve, autoritetet greke aktivizuan sistemin e emergjencës 112 dhe u kërkuan banorëve dhe pushuesve në Siviri të largohen menjëherë nga zona. Evakuimi duhet të kryhet në drejtim të Mola Kalivës, ndërsa qytetarët janë porositur të ndjekin udhëzimet e forcave të emergjencës.

Në terren ndodhen 52 zjarrfikës me 12 automjete, ndërsa operacioni nga ajri po mbështetet nga tre avionë dhe një helikopter. Forcat zjarrfikëse po punojnë për të vënë nën kontroll flakët dhe për të parandaluar përhapjen e tyre. Zjarret kanë rikthyer situatën e alarmit në Greqi, e cila prej ditësh po përballet me temperatura të larta dhe vatra të shumta zjarri. Pas zjarrit të rëndë në Atikë, autoritetet po përballen edhe me vatra të reja në juglindje të Athinës, ku rreth 200 zjarrfikës janë angazhuar në operacione.

Sipas të dhënave të Sistemit Evropian të Informacionit për Zjarret në Pyje (EFFIS), mbi 30 mijë hektarë tokë janë përfshirë nga zjarret në Greqi. Autoritetet kanë ngritur në nivelin 4 rrezikun nga zjarret në disa rajone, mes tyre Atika, Peloponezi, Kreta dhe zona e Athinës së Madhe. Situata mbetet e tensionuar, ndërsa temperaturat në vend pritet të arrijnë deri në 35°C dhe autoritetet vijojnë të monitorojnë zonat me rrezik të lartë për përhapjen e zjarreve.