Zonja e Parë e Shteteve të Bashkuara, Jill Biden, dha një nga sinjalet më të qarta deri më tani se presidenti Joe Biden do të kandidojë për një mandat të dytë.
Ajo i tha agjencisë Associated Press në një intervistë ekskluzive se nuk ka mbetur pothuajse asgjë tjetër për të bërë, përveçse të përcaktohet koha dhe vendi për shpalljen e kandidaturës.
“Ai thotë se ka akoma punë për të bërë. Ai nuk e ka përfunduar atë që ka filluar. Dhe kjo është gjëja më e rëndësishme,” tha zonja e parë në Nairobi, ndalesa e dytë dhe e fundit e udhëtimit të saj pesë ditor në Afrikë.
Zonja e Parë është cilësuar gjithmonë si një figurë kyçe në rrethin e Presidentit Biden, ndërsa ai bën planet për të ardhmen politike të tij. “Sepse unë jam gruaja e tij,” tha ajo duke qeshur.
Por ajo hodhi poshtë idenë se ka votën vendimtare nëse presidenti kandidon për rizgjedhje. “Sigurisht që ai do të më dëgjojë, sepse jemi bashkëshortë. Por ai e vendos vetë, më besoni” shtoi ajo.
Megjithëse Biden ka thënë prej kohësh se synon të kërkojë rizgjedhjen, ai ende nuk e ka zyrtarizuar atë dhe është përballur me pyetjet nëse është shumë i moshuar për të vazhduar të shërbejë si president.
Këshilltarët e zotit Biden kanë thënë se ai ka të ngjarë ta bëjë njoftimin në prill, e njëjta periudhë e vitit kur Presidenti Barack Obama nisi zyrtarisht fushatën e tij për rizgjedhje.