Guvernatori i ri nuk do votohet

pranuar të komentojë dje për mediat zgjedhjen e bërë nga kreu i shtetit, Bujar Nishani. Ndërsa kryetari i Kuvendit, Ilir Meta, ndryshe nga Rama, pranoi të fliste për procesin, por nuk dha vlerësim pozitiv dhe as negativ për emrin e kandidatit për Guvernator. Mendimi i numrit dy të koalicionit qeverisës është jo pak i rëndësishëm për zgjedhjen e kreut të Bankës së Shqipërisë, megjithatë Meta ka preferuar që LSI-ja ta shprehë qëndrimin në institucionet e Kuvendit, pas konsultimit me PS-në. Ndërkohë, deputetë të Partisë Socialiste thanë dje se ende nuk ka një vendim lidhur me qëndrimin që do të mbajë partia më e madhe në mazhorancë. Paraditen e sotme do të mblidhet grupi parlament socialist, ku pritet të diskutohet posaçërisht lidhur me emrin e Guvernatorit që ka sjellë kreu i shtetit për votim. Burime nga Partia Socialiste thanë dje se dy janë rezervat që kanë lidhur me procesin e zgjedhjes së Guvernatorit. Kontestimi i parë lidhet me emrin e kandidatit. Një pjesë e deputetëve të Partisë Socialiste janë shprehur se Guverantori  i ri Bankës së Shqipërisë duhet të ishte një emër më përfaqësues. Për këtë qëllim, kryeministri Edi Rama ka menduar prej kohësh emërimin e një guvernatori të huaj, i cili do të kishte kredibilitetin e duhur dhe përvojën ndërkombëtare, për të rikthyer imazhin e humbur të Bankës së Shqipërisë, sidomos pas skandalit të vjedhjes së thesarit të saj.

Rezerva e dytë e përfaqësuesve të mazhorancës lidhet me procedurat që ka ndjekur kreu i shtetit. Sipas tyre, ligji i njeh të drejtën Presidentit që të propozojë një emër për guvernatorin e ri, por ky emër duhet të dalë nga anëtarët e Këshillit Mbikëqyrës të Bankës së Shqipërisë. Sipas ligjit të Bankës, 5 prej anëtarëve të Këshillit zgjidhen nga Parlamenti, 3 nga Presidenti dhe 1 propozohet nga vetë Këshilli. Ndërkohë, emri i kandidatit për Guvernator, Gent Sejko nuk vjen prej asnjërës nga këto kategori që parashikon ligji, sipas disa burimeve nga selia rozë. Këto argumente pritet të diskutohen në Komisionin e Ekonomisë, ku do të prezantohet dhe kandidatura.

Megjithatë, ajo që bie në sy nga reagimet e politikës lidhet me faktin se kandidatura e kreut të shtetit rezulton të jetë e pakonsultuar. Deputetë të Partisë Socialiste thënë dje se emri i Sejkos nuk është përmendur në takimet që kryeministri Edi Rama ka zhvilluar me kreun e shtetit për këtë çështje. Nëse Sejko do të ishte një emër për të cilin palët kishin rënë dakord më parë, parimisht drejtuesit e mazhorancës do të kishin dhënë vlerësimet e para. Gjasat janë që kandidatura e z. Sejko të mos e kalojë testimin në Kuvend për të marrë drejtimin e Bankës së Shqipërisë. Megjithatë, mes Presidencës dhe Kryeministrisë ka pasur kontakte intensive gjatë ditëve të fundit.

Kryeministri Edi Rama ka deklaruar që pas shkarkimit të Fullanit, se Guvernatori i ri mund të jetë një shtetas i huaj. Për këtë qëllim, mazhoranca propozoi disa ditë më parë dhe ndryshimin e ligjit për Bankën e Shqipërisë. Sipas propozimit të PS-së, mospasja e shtetësisë shqiptare nuk është më kusht për të qenë pjesë e Këshillit Mbikqyrës të Bankës së Shqipërisë, ndryshim ky që vlen dhe për emrin e Guvernatorit të ri. Përballë lëvizjeve ligjore të mazhorancës dhe disa emrave të huaj nga bota e administrimit të bankave që janë lakuar në mediat afër mazhorancës, dekreti i kreut të shtetit duket se ka qenë i nxituar.

Burime shumë të rezervuara pranë qeverisë ‘Rama’ thonë se dekreti i Presidentit të Republikës do të rrëzohet dhe kjo do të sjellë një kolaps, pasi Presidenti edhe pas rrëzimit të emrit të propozuar, përsëri ka mundësi të propozojë emër tjetër e jo nga emrat që janë apo do të jenë anëtarë të Keshillit Mbikqyrës. Kjo vjen në serinë e rrëzimeve të njëpasnjëshme të dekreteve të Presidentit, çka e rrit tensionin mes Kryetarit të Shtetit dhe Kryeministrit, ndonëse kur takohen, i buzëqeshin formalisht njëri-tjetrit.