Ja një zgjidhje për Agim Kajmakun ose “Jorgo Toton” e Rilindjes, shpëton edhe kryeministri
Gjithë kjo zhurmë për kryebashkiakun e Rilindjes në Vorë, zotin Agim Kajmakun ose siç quhej në Greqi “Jorgo Toto”, po ngatërron dynjanë. Rilindja dhe Kajmaku thonë se është e gjitha një lojë dhe trill i PD-së, kurse Basha akuzon dhe i kërkon prokurorisë hetimin e të kaluarës së tij në Greqi, pasi sipas tyre është arrestuar për përdorim të monedhave false.
Prokuroria e kërkon për shenjat e gishtërinjve, pas presionit të opozitës, ndërsa Kajmaku, ose “Jorgo Toto” i dikurshëm, thotë se jam i ndershëm.
PD-ja prapë del dhe tregon disa dokumente se ai ka mashtruar në formularin e dekriminalizimit, ndaj duhet shkarkuar, bile arrestuar. Selia blu shkon edhe më tej, duke deklaruar se ai kërkohet për t’u arrestuar nga Greqia.
Kajmaku ynë rilindas iniston dhe shkruan në facebook se “PD-ja gënjen”.
E kështu pafund, një lum akuzash.
Ndaj që të mos lërë PD-në duke sulmuar apo Rilindjen me zemër në dorë, kryebashkiaku rilindas ka një zgjidhje të shpejtë dhe shumë të zgjuar: të shkojë në Janinë, se është më afër, të pijë një kafe. Dhe të postojë një foto nga kalaja e Ali Pashë Tepelenës në Janinë.
Jo në Tepelenë, por në Janinë!
Nëse kalon kufirin dhe nëse e pi kafen në Janinë, pa probleme, i fut dhe një foto në facebook, e kështu rrëzohet çdo akuzë e PD-së se ndaj tij ka kërkim nga pala greke për ta arrestuar.
Por, për dreq, Kajmaku duhet të marrë me vete dhe triko leshi, ndonëse tani është ngrohtë, sepse nëse e arrestojnë do jetë ftohtë në qelitë e Janinës!
Pra, Kajmaku e ka zgjidhjen që të mos lodhë PS dhe as të mundojë Gazment Bardhin e PD-së: të niset sot për Janinë dhe ta pijë kafe duke na postuar një foto në facebook.
Dhe ja u zgjidh gjithë ky lëmsh!
Të mos harrojë dhe një triko leshi me vete!
S.P.
