Kryetarët aleatë, jo në listat e PD-së

Lulëzim Basha ka vendosur që në zgjedhjet e ardhshme të mos bëjë gabimet e ish-kryetarit Sali Berisha. Sinjali i parë që tregon për një ndryshim kursi është procedura e zgjedhjes së kandidatëve për deputetë. Selia blu nuk do të lejojë që në lisat e 140 kandidatëve të saj për deputetë të jenë emrat e kryetarëve të partive aleate të PD-së. Një fakt i tillë është konfirmuar nga numri dy i PD-së, nënkryetari i partisë, Edmond Spaho. Nënkryetari i PD-së nuk e ka fshehur se procedura e ndjekur në vitin 2013 nga ish-kryeministri Sali Berisha, i cili futi shumicën e kryetarëve të partive aleate në lista, ka rezultuar e gabuar. “Nuk ka për të pasur individë nga partitë e tjera, qofshin këta edhe kryetarë, që të jenë në listat e PD. Eksperienca e zgjedhjeve të vitit 2013 tregoi që nuk ishte ndoshta më e mira”,- tha Spaho për “Neës24”. Një deklaratë e tillë sigurisht që nuk është bërë pa lejen e Bashës.

Në vitin 2013 për shkak të konsumit të qeverisjes 8-vjeçare dhe ikjes së LSI-së nga koalicionit, Berisha zgjeroi rrethin e aleatëve duke futur në lista thuajse gjithë kryetarët. Fatmir Mediu, Dashamir Shehi, Nard Noka, Shpëtim Idrizi ishin kryetarët e partive aleatë që nuk u zgjodhën direkt nga votat e elektoratit të tyre, por u votuan në listat e Partisë Demokratike. Edhe pse një lëvizje e tillë e Berishës synonte që të garantonte bashkimin e së djathtës, nuk rezultoi efektive. Kjo për faktin se një pjesë e elektoratit të Partisë Demokratike nuk shihte në listat përfaqësuesit e PD-së, por kryetarët që përfaqësonin interesat e republikanëve, çamëve dhe forcave të tjera politike. Por nuk ishte ky i vetmi gabim taktik. Për shkak se krerët e partive aleate përfaqësojnë interesa të tjera nga ato të Partisë Demokratike, në momente të caktuara krizash politike, aleatët nuk e kanë problem të ndryshojnë kampin politik. Shembulli më i qartë i kësaj skeme është Partia për Drejtësi Integrim dhe Unitet. Edhe pse u formësua si subjekt politik në qeverisjen e PD, edhe pse votat dhe mandatet e 5 deputetëve i mori nga vendosja në listat e PD-së, në fund PDIU zgjodhi të qeverisë me PS, sapo e djathta doli në opozitë.

Skema e vitit 2013 e katandisi PD-në 41 deputetë që mbajnë direkt siglën e saj, duke qenë se një pjesë u përkasin partive aleate. Për këtë qëllim Basha duket se ka vendosur që të pres shpresat e aleatëve se do të zgjidhen deputet në kurriz të Partisë Demokratike.

Përveç përvojës se hidhur të Berishës në vitin 2013, Basha ka pamundësi teknike për të kënaqur aleatët. Në mbledhjen e fundit me koalicionin opozitar ishin 12 parti që morën pjesë. Nëse Basha do të vendos të mbështesë aleatët automatikisht duhet të heq 12 deputetë të PD-së dhe mandatet t’ua falë aleatëve që nuk dihet se me kë do të shkojnë pas zgjedhjeve. Nga pikëpamja elektorale futja e aleatëve në lista, përveç imazhit mediatik, PD-së nuk i sjellë asnjë përfitim konkret. Një pjesë e partive në koalicion përveç emrit të kryetarit nuk kanë numër të madh votuesish. Me garantimin e mandatit në listën e PD-së asnjë kryetar partie nuk ka më motiv të bëjë fushatë në terren. Asnjë nuk merr mundimin të sjellë vota pasi është i sigurtë për vete.

Për sa kohë që Basha ka nisur procedura të reja për zgjedhjen e kandidatëve duke kërkuar mendimin e Bashës, do të ishte e padrejtë për elektoratin e djathtë që në fund të procesit në krye apo mes listave të janë emrat e aleatëve dhe jo të demokratëve.

Gjithsesi në fund është kryetari ai që vendos, derisa edhe për këto zgjedhje në fuqi mbeti Kodi Elektoral me lista e mbyllura.