Shqipëria drejt kaosit total. Ndërkombëtarë, ndërhyni!

-Opozita, pas deklaratës së kryeministrit Rama, ka vendosur të radikalizojë qëndrimet në lidhje me protestat. Nuk do t’i mbajë më nën fre protestuesit, por do t’i lerë të vijnë francezët të marrin shembull nga pala shqiptare se si zhvillohen demonstratat kundër një qeverie.

-Brukseli dhe Uashingtoni, përveç deklaratave, të vijnë dhe t’i ulin palët politike në gjetjen e një zgjidhje të gjithëpranueshme në mënyrë që Shqipëria të mos futet në spiralen e përplasjeve të dhunshme  civile, duke dhënë shembull negativ edhe për Kosovën, pra në krijimin e një situate destabilizimi të Rajonit të Ballkanit Perëndimor.

Tashmë jemi para dy faktëve: Opozita e bashkuar ka dorëzuar mandatet e deputetit në mënyrë publike dhe kërkon me çdo kusht rrëzimin e kryeministrit Rama, duke i hapur rrugën një qeverie tranzitore e cila të drejtojë vendin drejt zgjedhjeve të parakohshme parlamentare, por edhe plotësimin e kushtëve për në BE. Dhe fakti i dytë: Mbrëmë kryeministri Rama doli dhe tha se nuk jep dorëheqje dhe se zgjedhjet do të bëhen në vitin 2021. Kjo i hodhi flakën benzinës së opozitës, e cila endet nëpër xhepa popullorë, por deri dje Lulzim Basha dhe Monika Kryemadhi i kanë mbajtur me zor nën kontroll turmat e egërsuara kundrejt kryeministrit, të cilët janë gati jo vetëm të djegin parlamentin, por edhe kryeministrinë dhe vilat në Surrel.

Asnjëra palë nuk tërhiqet, ndërkohë që opozita hoqi dorë nga qëndrimi në Kuvend, sepse siç ka akuzuar ajo, votat u blenë nga krimi organizuar,pasi edhe “Zëri Amerikës” e faktoi para disa javëve. Opozita e ka vendim pa kthim ikjen nga parlamenti. Ndërsa mazhoranca, e cila ka ardhur në pushtet në vota të blera siç janë faktet edhe në prokurori, pra pikërisht shumica e momentit duhej të ishte e hapur për gjetjen e një zgjidhje të përbashkët në favor të popullit, duke pranuar një qeveri tranzitore që vendi të mos digjet. Ndërkombëtarët pranojnë se votat u blenë, siç mbetet në fuqi raporti i OSBE pas zgjedhjeve të qershorit 2017, por edhe kritikojnë vendimin e opozitës për dorëzimin e mandatëve. Nisur nga shtetformimi dhe demokracia e vendeve të tyre me traditë në fushën e ligjit, kjo kërkesë e tyre është e drejtë, por duke ditur se flitet për Shqipërinë, ku ka patur që nga viti 1996 probleme themelore me votën, duhet kërkuar gjetja e një zgjidhje të pranueshme për opozitën dhe mazhorancën, sepse vendi po shkon drejt një përplasje të fortë civile në javët në vazhdim. Kjo gjë duket e sigurtë nga protesta e djeshme e opozitës dhe dalja e kryeministrit që në vend të fliste për thelbin e kritikave të opozitës merrej duke sqaruar se mund të ketë gabuar se ka dalë me atlete apo lakuriq, dikur. Nuk kishte sens gjithë ajo konferencë shtypi e kryeministrit, kur fare mirë mund të ofronte që të uleshin ai, Lulzim Basha dhe Monika Kryemadhi në tryezë në gjetjen e një zgjidhje politike. Aq më tepër nëse ndjen se ka votat, fare mirë pranon zgjedhjet e parakohshme parlamentare me një qeveri që nuk mund ta akuzojnë nesër, dhe ti fitojë. Nëse fiton, siç  flet gjithë pompozitet, atëhere le të bëhet vetë edhe kryeministër, edhe kryetar i SPAK! Por të shkojë njëherë në zgjedhje me qeveri tjetër.

Ndërkohë opozita pas deklaratës së kryeministrit ka vendosur të radikalizojë qëndrimet në lidhje me protestat. Nuk do ti mbajë më nën fre protestuesit, por do t’i lerë të vijnë parizienët të marrin shembull nga pala shqiptare kundër kryeministrit Rama.

Ndaj duhet ndërkombëtarët, përveç deklaratave, të vijnë dhe ti ulin palët në gjetjen e një zgjidhje, të gjithëpranueshme në mënyrë që Shqipëria të mos futet në spiralen e përplasjeve të dhunshme, duke dhënë shembull negativ edhe për Kosovën. Pra nga Shqipëria mund të shpërngulen përplasjet dhe dhuna në Kosovë, duke sjellë një destabilizim të Rajonit të Ballkanit. /A.Marku/