Banka e Shqipërisë rrit vlerën e lekut

Vendimi i Bankës së Shqipërisë për rritjen e vlerës së lekut është reflektuar tek ankandet e bonove të thesarit, duke shtrenjtuar borxhin për qeverinë.

Të dhënat e Bankës së Shqipërisë tregojnë se në ankandin e një dite më parë, bonot me afat 12-mujor u shitën me një interes mesatar prej 2,19%, nga 1,79% që kishte qenë ky tregues në ankandin e mëparshëm.

Kjo rritje e interesave, çka është me leverdi për të gjithë investitorët, pasi rrit fitimin e tyre, ka reflektuar ndryshimin e normës bazë të interesit për lekun, të cilin Banka Qendrore e rriti nga 0,5% në 1%, në përpjekje për të mbajtur nën kontroll inflacionin.

Nga 9,7 miliardë lekë që ishte shuma e shpallur për financim, në ankand u paraqitën kërkesa totale në shumën e 8,5 miliardë lekëve, ndërsa Ministria e Financave pranoi oferta për më pak se 8 miliardë lekë.