Agjencia Shqiptare e Zhvillimit të Investimeve (AIDA) nis një fushatë kombëtare informuese dhe promovuese për ndërmarrjet e vogla dhe të mesme (SME), në bashkëpunim me 10 bashki të vendit dhe AIC ( Albanian Investment Corporation).
Fushata synon t’u afrojë bizneseve informacion dhe mundësi për financimet, eksportet, përputhshmërinë me standardet e BE-së, taksat dhe TVSH-në, si dhe pjesëmarrjen në panaire dhe evente ndërkombëtare. Përmes sesioneve informuese në bashkëpunim me bashkitë dhe AIC; SME-të do të kenë akses të drejtpërdrejtë në programet mbështetëse, mundësi promovimi ndërkombëtar përmes platformës Kompass dhe informacion mbi mundësitë e reja për rritjen dhe zhvillimin e biznesit.
Fushata do të zhvillohet në dy raunde. Në shtator-dhjetor 2026 aktivitetet do të organizohen në Durrës, Elbasan, Fier, Vlorë dhe Gjirokastër, ndërsa në janar–prill 2027 do të vijojnë në Korçë, Berat, Kukës, Lezhë dhe Shkodër.
Nisma e mbështetur nga AIDA, AIC, projekti EEN Albania dhe bashkitë, synon të forcojë lidhjen mes institucioneve dhe komunitetit të biznesit dhe t’u krijojë SME-ve më shumë mundësi për rritje, konkurrueshmëri dhe orientim drejt tregjeve ndërkombëtare.
