Premtimi për asfaltimin e rrugës në fshatin Murriqan është bërë realitet. Rruga që dikur ishte e pakalueshme, sot i ka dhënë një pamje krejtësisht të re fshatit.
Ky projekt është realizuar në vazhdën e premtimeve të mbajtura nga bashkia, ku pas unazës bujqësore, tashmë është përfunduar edhe rruga që lidh qendrën e fshatit. Investimi i ri u ka shërbyer jo vetëm 1700 banorëve të zonës, por edhe bujqësisë. Me mbi 400 hektarë tokë bujqësore, Murriqani është një nga fshatrat më aktivë në prodhimin bujqësor, dhe tashmë fermerët kanë një akses më të lehtë për të transportuar prodhimet drejt tregjeve përmes rrugës nacionale.
Kryetari i Bashkisë Elbasan, Gledian Llatja, ka parë nga afër përfundimin e punimeve, duke theksuar se “asfaltimi i kësaj rruge është një tjetër premtim i mbajtur dhe një investim që u shërben drejtpërdrejt banorëve, ekonomisë dhe bujqësisë lokale.”
Rruga i shërben gjithashtu edhe fëmijëve të shkollës, duke rritur sigurinë dhe lehtësuar qarkullimin për çdo kategori banorësh. Ky investim ka ndikuar drejtpërdrejt në ekonominë lokale dhe përmirësimin e cilësisë së jetës në Murriqan.
