Drejtori i Policisë së Tiranës, Tonin Vocaj dhe zv/drejtori Alket Shatro kanë mbërritur paraditen e sotme në spitalin e Traumës për të vizituar avokatin Sokol Mëngjesi.
Dy zyrtarët e policisë u futën brenda ambienteve të Traumës, ku Sokol Mëngjesi ndodhet i shtruar prej më shumë se 48 orësh.
Gjendja shëndetësore e përfaqësuesit ligjor të ish-kryeministrit Sali Berisha, i cili u dhunua rreth orës 08:30 të mëngjesit të 29 majit në ish-Bllok, vijon të mbetet e rëndë.
Mësohet se gjendja e juristit, i cili ndodhet në intubim, nuk ka asnjë ndryshim.
Sokol Mëngjesi u dhunua brutalisht nga tre të rinj, sapo avokati kishte lënë djalin e tij në kopsht.
Ai u godit me doreza hekuri në pjesën e kokës dhe në momentin që ka rënë në tokë, është goditur serish me mjete të forta dhe shkelma, duke i shkaktuar dëme të shumta në kokë, përfshi hematomat dhe frakturat.
Dyshohet se urdhëruesi i sulmit ndaj juristit është Dritan Nano, i cili është arrestuar, dhe mësohet se mes tyre ka pasur konflikt për një marrëveshje që kishin lidhur për një pronë.
Autorët e sulmit janë identifikuar si Dorian Alia 32 vjeç, Drivald Alia 21 vjeç, Elton Kasaj 33 vjeç, ndërsa Romario Tabaku 26 vjeç, i ka ndihmuar të largoheshin nga vendngjarja me makinë.
Dorian Alia është vetëdorëzuar në polici, ndërsa tre autorët e tjerë të ngjarjes së rëndë vijojnë të jenë në kërkim.