Gjykata e Tiranës ka shpallur të paligjshëm arrestimin e 14 protestuesve të ndaluar gjatë tubimit të zhvilluar më 1 shtator përpara Kryeministrisë, duke urdhëruar lirimin e menjëhershëm të tyre.
Pas përfundimit të procedurave administrative, protestuesit kanë lënë ambientet e Komisariatit të Policisë Nr. 3 në Tiranë. Jashtë komisariatit ishin mbledhur dhjetëra qytetarë dhe mbështetës, të cilët i pritën të liruarit me ovacione, thirrje dhe brohoritje.
Vendimi i gjykatës erdhi pasi u rrëzuan kërkesat e Prokurorisë, e cila kishte kërkuar vendosjen e masës së sigurisë “detyrim për paraqitje”, si dhe ndalimin e hyrjes së tyre në territorin e Komisariateve Nr. 1, 2 dhe 3.
Gjykata e konsideroi të paligjshme procedurën e shoqërimit të protestuesve dhe vendosi lirimin e tyre pa asnjë masë shtrënguese.