Ish-zv.ministri i Ekonomisë dhe Energjetikës Eno Bozdo i përgjigjet pretendimeve të sotme të kryeministrit Edi Rama të cilit i kujton se Rafineria e Ballshit është sot e mbyllur dhe punonjësit në mjerim pa paga nga investitorët “seriozë” të kryeministrit.
“Meqenëse Edi Rama më përmendi sot emrin:
Punëtorët e Rafinerisë janë në grevë sepse investitori serioz i Edi Ramës ia mbathi me dhjetëra milionë euro fitim, pa paguar punëtorët dhe as detyrimet ndaj qeverisë së Edi Ramës. Ia mbathi në mes të ditës, pa i hyrë gjëmb në këmbë. Këtë skemë e bëri jo vetëm një herë, por 3 herë. Fitoi qindra milionë euro, pa dhënë rroga dhe detyrime.
Investitori serioz i Edi Ramës, regjistroi 3 herë kompani offshore, sigurisht “pa dijeninë” e Edi Ramës. Dhe po tre herë përsëriti të njëjtën skemë: erdhi, pa dhe fitoi.
Bashkë me të fitoi Edi Rama dhe ministrat e tij. Humbën ata që nën këtë qeveri, humbin gjithmonë: njerëzit e varfër dhe punëtorët e pamundur.
Punëtorët aty duan zgjidhje. Duan paratë që u takojnë për punën e tyre të ndershme.
Nuk kanë nevojë për batuta, po për bukë për familjet e tyre.
Zgjidhja është ajo që Lulzim Basha ka ofruar: 8 milionë euro paga të pa dhëna dhe ndjekje penale për investitorin serioz të Edi Ramës!”, deklaron Eno Bozdo.