Deputeti i PD-së, Bardh Spahia thotë se protestat në vend do të vijojnë të përshkallëzohen, duke i cilësuar ato si pjesë e një lëvizjeje më të gjerë qytetare kundër qeverisë. Sipas tij, protesta e fundit kishte një simbolikë të fortë për Partinë Demokratike dhe opozitarizmin në Shqipëri, duke qenë pjesë e valës së protestave të nisura me synimin për largimin nga pushteti të qeverisë së Edi Ramës.
”Ajo e djeshmja ishte një protestë me një simbolikë të fortë për Partinë Demokratike dhe për opozitarizmin në Shqipëri. Në fakt, është në vazhdën e asaj vale protestash që ka iniciuar tashmë Partia Demokratike dhe opozita shqiptare me synimin final për të larguar nga qeverisja Edi Ramën”,-tha Spahia në ”A2Cnn”.
Për të ndryshimi i formave të protestës tregon se qytetarëve u është lënë më shumë hapësirë për të shprehur reagimin e tyre ndaj institucioneve. ”Ju la në dorë qytetarëve shqiptarë të reagonin, të tregonin prezencën e tyre, reagimin e tyre karshi institucioneve të cilat i konsiderojnë të kapura tashmë nga krimi i organizuar dhe mafia në pushtet”,-deklaroi ai.
Ai theksoi gjithashtu simbolikën e datës 22 mars, duke e lidhur me vlera historike dhe demokratike që, sipas tij, mbeten thelbësore për opozitën. ”Ishte një simbolikë e fortë edhe për faktin se u zhvillua me datën 22 mars, një datë historike që evokon vlerat dhe parimet të cilat opozita shqiptare i ka të shenjta”,-u shpreh Spahia. Ai bën thirrje për reagim më të gjerë qytetar në mbrojtje të institucioneve demokratike dhe dinjitetit personal.