Autoritetet shqiptare kanë nisur zyrtarisht procedurat për ekstradimin e biznesmenit Ermal Beqiraj, i cili u arrestua në Francë. 44-vjeçari ndodhet në paraburgim dhe këtë të mërkurë është paraqitur në Gjykatën Penale të Amiens, ku i është komunikuar kërkimi ndërkombëtar i lëshuar ndaj tij nga autoritetet shqiptare.
Sipas procedurave, brenda një afati prej 40 ditësh, dokumentacioni i nevojshëm për arrestin duhet t’u dorëzohet autoriteteve franceze. Në rast se Beqiraj pranon ekstradimin, kthimi i tij në Shqipëri mund të realizohet në një kohë të shkurtër, ndërsa nëse kundërshton, procesi pritet të zgjasë më shumë.
Arrestimi i biznesmenit në Francë lidhet me një incident ajror, pasi ai dyshohet se ka fluturuar me një avion të lehtë në lartësi të ulët pranë centralit bërthamor të Penly. Pas sinjalizimit të autoriteteve franceze, avioni u shoqërua nga Forcat Ajrore drejt aeroportit të Albertit, ku Beqiraj u ndalua për t’u marrë në pyetje.
Gjatë deklarimeve të tij, biznesmeni ka mohuar që veprimi të ketë qenë i qëllimshëm, duke thënë se në atë moment ishte duke komunikuar në telefon me nënën e tij. Pas vendosjes së një gjobe prej 7 mijë eurosh, ai ishte lënë i lirë, por nën monitorim policor.
Pas verifikimit të të dhënave dhe konstatimit se ai ishte shpallur në kërkim ndërkombëtar nga Shqipëria, autoritetet franceze e ndaluan sërish në banesë dhe njoftuan institucionet shqiptare. Ermal Beqiraj u shpall në kërkim nga SPAK më 21 dhjetor 2025, në kuadër të hetimeve për tenderët e AKSHI-t. Hetimet lidhen me aktivitetin e kompanisë së tij “Soft & Solution”.