Deputeti i Partisë Demokratike, Klevis Balliu, ka reaguar pas ngjarjes me të shtëna me armë zjarri në një zonë turistike, duke akuzuar qeverinë për krijimin e një klime pasigurie dhe për lidhje të dyshuara mes politikës, biznesit dhe botës së krimit. Në deklaratën e tij, Balliu u shpreh se “kapja e shtetit nga interesat kriminale” ka zhdukur kufijtë mes këtyre fushave dhe kritikoi faktin që incidente të tilla ndodhin në kulmin e sezonit turistik, përballë qytetarëve dhe pushuesve.
Postimi i plotë
Kapja e shtetit nga interesat kriminale ka shkatërruar çdo vijë ndarëse mes politikës, biznesit dhe botës së krimit. Është e papranueshme që në kulmin e sezonit turistik, përballë mijëra pushuesve, të dëgjohen të shtëna me armë zjarri, duke krijuar një klimë pasigurie që nuk i përket një vendi europian, por një shteti ku pandëshkueshmëria ka zëvendësuar ligjin.
Paradoksi është se Edi Rama fajëson protestat e qytetarëve për dëmtimin e turizmit, ndërkohë që ata që ndihen të paprekshëm terrorizojnë pushuesit me armë në mes të zonave turistike. Turizmin nuk e dëmtojnë protestuesit që kërkojnë drejtësi dhe luftojnë korrupsionin; e dëmtojnë krimi, pasiguria dhe perceptimi se në Shqipëri ligji nuk vepron njësoj për të gjithë.
Partia Demokratike dënon me forcë këtë akt kriminal dhe u kërkon organeve ligjzbatuese të veprojnë pa asnjë hezitim, të identifikojnë dhe të vendosin përpara drejtësisë autorët. Shqipëria meriton një shtet ku sundon ligji, jo frika dhe pandëshkueshmëria.