Deputeti i Partisë Demokratike, Saimir Korreshi, ka kundërshtuar në Kuvend propozimin e mazhorancës për hartën e re territoriale, duke u ndalur veçanërisht te përfshirja e Divjakës në një bashkim të ri administrativ me Lushnjën.
Në një fjalim me tone të ashpra dhe ironike, Korreshi akuzoi Partinë Socialiste se reforma nuk do të sjellë përmirësim të shërbimeve për qytetarët, por përkundrazi do të thellojë përplasjet mes banorëve të dy zonave.
“Ju keni futur edhe sharjen e urrejtjen mes lushnjarëve e Divjakës. Askush nuk e do këtë bashkim”, deklaroi Korreshi, duke kritikuar edhe mënyrën se si, sipas tij, është argumentuar nevoja për reformën. Deputeti demokrat ironizoi gjithashtu figurat politike që kanë përfituar nga sistemi aktual, duke përmendur edhe Ceno Klosin dhe rezultatin e tij në Divjakë.
Korreshi e shtriu kritikën edhe te gjendja e shërbimeve publike në zonë. Ai pretendoi se problematikat me menaxhimin e mbetjeve, zjarret, pastrimin e territorit dhe mirëmbajtjen e rezervuarëve vijojnë të jenë të pranishme. “Pretendoni shërbime publike? Po ju s’keni hale”, tha ai, duke shtuar se bashkia është përfshirë në një sistem patronazhimi politik.