Gjatë episodit të fundit të podkastit “Flasim”, Edi Rama njoftoi se qeveria ka vendosur rritje të ndjeshme të kompensimeve për ushtarakët shqiptarë, duke përfshirë pagat, fonde shtesë dhe mbulimin e kostos së transportit.
Rama theksoi se buxheti për vitin 2026 parashikon një rritje prej rreth 12% të financimeve për mbrojtjen krahasuar me vitin e kaluar, duke synuar përmbushjen e angazhimeve të Shqipërisë ndaj standardeve të NATO-s dhe garantimin e një trajtimi dinjitoz për Forcat e Armatosura.
“Në fund të shkurtit vendosëm rritjen e pagave për ushtarakët, që ka efekt që nga janari, ndërsa në mbledhjen e fundit të qeverisë miratuam edhe mbulimin e kostos së transportit për çdo ushtarak aktiv”, shpjegoi Rama.
Kryeministri shtoi se qëllimi i qeverisë është që paga e ushtarit bazë të arrijë mesataren e vendeve të NATO-s deri në fund të këtij mandati. Ai deklaroi se rritja e pagës është një objektiv i qartë dhe ambicioz: “Deri në fund të këtij mandati, paga e ushtarit bazë do të rritet deri në 70%”.