Në seancën e kësaj të enjte, Kuvendi ka miratuar disa projektligje që lidhen me sektorin e bujqësisë, ndërsa votimi ka sjellë edhe një qëndrim ndryshe nga deputeti i PS-së, Erion Braçe, i cili ka votuar kundër një prej nismave dhe ka abstenuar në një tjetër, ndërkohë që opozita nuk mori pjesë në votime pasi bojkotoi seancën. Projektligji “Për dëftesat tregtare mbi produktet bujqësore” u miratua me 71 vota pro, një abstenim dhe një votë kundër. Abstenimi erdhi nga Erion Braçe, ndërsa kundër votoi deputeti Erald Kapri.
Votimet
Projektligji “Për dëftesat tregtare mbi produktet bujqësore”.
Votimi: 71 pro; 1 abstenim (Braçe); 1 kundër (Kapri)
Projektligji “Për censin e bujqësisë”
Votimi: 77 pro; 0 abstenim; 1 kundër (Kapri)
Projektligji “Për disa ndryshime dhe shtesa në ligjin nr. 27/2016, “Për menaxhimin e kimikateve”, të ndryshuar”
Votimi: 78 pro; 0 abstenim, 1 kundër (Kapri)
Projektligji “Për një ndryshim në ligjin nr. 103/2016, “Për akuakulturën””
Votimi: 76 pro; 0 abstenim; 1 kundër (Kapri)
Projektligji “Për disa shtesa dhe ndryshime në ligjin nr. 9244, datë 17.6.2004, “Për mbrojtjen e tokës bujqësore”, të ndryshuar”.
Votimi: 78 pro; 0 abstenim; 2 kundër (Braçe; Kapri)
Borxhet mes grumbulluesve, tregtarëve, eksportuesve dhe prodhuesve bujqësorë kanë arritur në rreth 10 milionë euro, duke prekur më së shumti fermerët, të cilëve shpesh u vonohen ose nuk u kryhen pagesat. Për të adresuar këtë problem, qeveria ka hartuar projektligjin “Për dëftesat tregtare mbi produktet bujqësore”, i cili u mundëson fermerëve të përdorin produktet bujqësore ose faturat e shitjes si garanci për të marrë financim nga bankat. Megjithatë, deputeti Erion Braçe vlerëson se ligji nuk mjafton pa reforma në treg dhe sistemin fiskal. Sipas qeverisë, nisma synon të rrisë financimin në bujqësi, të përmirësojë marrëdhëniet mes fermerëve dhe grumbulluesve dhe të nxisë prodhimin.
