Një ngjarje e rëndë ndodhi mbrëmjen e djeshme në fshatin Markatomaj në Lezhë, ku gjashtë anëtarë të një familjeje, mes tyre dy fëmijë, mbetën të lënduar për shkak të rrjedhjes së gazit në banesë.
Në lidhje me ngjarjen reagoi edhe ministri i Infrastrukturës dhe Energjisë, Enea Karakaçi, i cili theksoi se siguria në përdorimin e gazit është përgjegjësi e të gjithëve.
Sipas ministrit, bazuar në pamjet e videos, mënyra e instalimit të bombolës së gazit dhe mënyra e ruajtjes së saj nga familja kanë qenë jashtë kushteve teknike të sigurisë, duke shkaktuar rrjedhjen e gazit brenda banesës.
Ai theksoi se bombolat e gazit i nënshtrohen kontrolleve të rrepta të sigurisë nga strukturat e Ministrisë gjatë importit, transportit dhe shitjes, por nënvizoi se përgjegjësia për sigurinë nuk përfundon me këto kontrolle.
Sipas ministrit, instalimi i bombolave duhet të kryhet në përputhje me rregullat teknike dhe ato duhet të mbahen larg fëmijëve.
Karakaçi u bëri thirrje qytetarëve që, në kushtet e përdorimit të gjerë të gazit, të tregojnë kujdes maksimal në zbatimin e rregullave të sigurisë teknike, në mënyrë që të evitohen ngjarje me pasoja të rënda.
“Ngjarja e rëndë në Lezhë na kujton se instalimi i bombolave sipas rregullave dhe ruajtja e tyre në mënyrë të sigurt, veçanërisht larg fëmijëve, janë jetike për të shmangur pasoja të rënda. Uroj shërim të shpejtë për të plagosurit”, theksoi ai.