Arbjan Mazniku ka komentuar ndryshimet që pritet të sjellë harta e re territoriale, duke mohuar se reforma është konceptuar me synime elektorale. I ftuar në emisionin “Top Story”, Mazniku deklaroi se bashkimi i disa njësive vendore nuk pritet të ndryshojë raportet politike në nivel bashkish. Sipas tij, ndryshimet territoriale synojnë kryesisht krijimin e njësive me më shumë potencial për zhvillim.
Duke iu referuar Korçës dhe Maliqit, ministri tha se nuk sheh një rrezik elektoral për Partinë Socialiste nga riorganizimi i territorit. Ai përmendi edhe rastin e Vlorës dhe Selenicës, duke argumentuar se bashkimi i tyre mund të krijojë më shumë mundësi zhvillimi sesa funksionimi i tyre si dy bashki të veçanta. Mazniku u ndal edhe te Kavaja, duke e cilësuar atë si rastin ku mund të ngrihet një argument mbi ndikimin politik të ndryshimeve. Megjithatë, ai theksoi se edhe në këtë rast drejtimi i bashkisë nuk përcaktohet vetëm nga ndryshimi territorial.
Një tjetër pikë e diskutimit ishte ruajtja e strukturave administrative. Mazniku sqaroi se ndryshimet nuk do të nënkuptojnë zhvendosjen e godinave administrative, duke garantuar vijimin e funksionimit të tyre në vendndodhjet aktuale. “Se ke dy bashki apo një, nuk ndryshon asgjë”, u shpreh Mazniku, duke këmbëngulur se reforma nuk synon të ndryshojë ekuilibrat politikë, por të krijojë një organizim territorial me më shumë mundësi zhvillimi.
