Gazetari i njohur, Erl Murati thotë se sulmi në Banjskë nuk është një rebelim i momentit, por një kryengritje e përgatitur shumë mirë, pasi e faktuan armatimet e rënda. Ndërsa në lidhje me arrestimin e ish- nënkryetarit të Listës Serbe, Milan Radoiçiç, Murati tha se ai ka mbrojtjen e presidentit serb Vuçiç dhe gjithë serbëve.
“Do ishte naivitet të besohet se Radoiçiç veproi me kokën e vetë. Ne pamë një njësi ushtarake të armatosur rëndë e cila po përgatitet për një kryengritje. Nuk kemi të bëjmë me një rebelim të momentit. Kjo njësi ishte trajnuar për këtë akt terrorist. Janë frymëzuar nga politikat e Vuçiç.
Fajtorët e vërtetë duhen kërkuar në Beograd dhe Kurti me të drejtë i vuri gishtin Serbisë dhe Vuçiç. Nuk ishte një incident i izoluar por një njësi që ishte përgatitur. Besoj se përgjegjësia duhet kërkuar në Beograd. Radoiçiç ka mbrojtën e Vuçiç dhe serbëve. Bën mirë që edhe Tirana të kërkojë të njëjtën gjë si ndërkombëtarët.
Nuk ka pse të mbajë një qëndrim të baraslarguar për Kosovë , pasi jemi bashkë. Tiranë duhet të jetë e para që nuk duhet të vejë në diskutim territorin e Kosovës. Nëse Tirana nuk kontribuon në të mirë të Kosovës, duhet të heshtë”, tha Murati.