Edi Rama ka përgjegjësi për qeverisjen dhe për çdo arsye që i nxjerr qytetarët në protestë. Por kjo nuk do të thotë se Sali Berisha fiton automatikisht besimin e tyre. Pikërisht këtu është problemi më i madh i opozitës shqiptare: ajo kërkon largimin e Ramës, por nuk arrin t’i bindë njerëzit se nën drejtimin e saj vendi do të qeverisej më mirë.
Berisha e ka kthyer protestën e Bulevardit në provën e forcës së vet politike. Por pyetja është: Çfarë besimi të ri ka krijuar opozita? Një qytetar mund të jetë i zemëruar me qeverinë dhe, njëkohësisht, të mos shohë te Berisha zgjidhjen. Me gjithë këto skandale nga mazhoranca, çdo opozitë në botë e kishte rrëzuar qeverinë e tij. Por asgjë nuk ndodh, realisht.
Kjo është një e vërtetë që PD-ja duhet ta dëgjojë, sado e pakëndshme të jetë. Pakënaqësia me Ramën nuk është pronë e Berishës. Protestuesit nuk janë një çek politik që mund të arkëtohet në emër të kryetarit të opozitës. Shumë prej tyre kërkojnë llogaridhënie, drejtësi dhe ndryshim; por për t’i përfaqësuar, nuk mjafton t’u thuash kundër kujt je. Duhet t’u japësh arsye të forta të besojnë te ti.
Berisha flet për rrëzimin e qeverisë, por opozita që ai drejton duhet të flasë shumë më qartë për qeverisjen që propozon. Kush do t’i marrë vendimet? Si do të përzgjidhen njerëzit? Çfarë do të ndryshojë në marrëdhënien e shtetit me qytetarin? Pa përgjigje bindëse, çdo thirrje për rotacion rrezikon të tingëllojë si kërkesë për rikthimin e një emri, jo si ofertë për të ardhmen e vendit.
Kjo i jep Ramës një avantazh që nuk ia siguron domosdoshmërisht qeverisja e tij. Ia siguron dobësia e kundërshtarit. Sa herë opozita e kufizon debatin te përplasja Rama–Berisha, kryeministri e ka më të lehtë t’i shmanget debatit për bilancin e vet. Një opozitë që nuk zgjeron besimin përtej mbështetësve të saj më besnikë, në fund e ndihmon pushtetin që pretendon të largojë.
Berisha nuk duhet ta përdorë si provë se çdo njeri i pakënaqur me Ramën është gati t’i besojë atij. Nëse PD-ja nuk e kupton këtë dallim, mund të vazhdojë të mbushë mendjen vetvetes, por jo njerëzve.
Rama duhet të japë llogari për pushtetin dhe qeverisjen. Berisha duhet të japë arsye pse qytetarët duhet t’ia besojnë pushtetin. Deri tani, zemërimi kundër qeverisë dëgjohet më fort se alternativa e opozitës. Dhe ky është dështim politik për të cilin Berisha nuk mund të fajësojë askënd tjetër. /E.M./