Kryetari i PD-së, Sali Berisha, deklaroi këtë të hënë se në kampin qeveritar ka përplasje dhe shqetësim për shkak të lëvizjes së protestave rinore. Ai paralajmëroi se kreu aktual i Kuvendit, Niko Peleshi, mund të zëvendësohet nga Taulant Balla. Sipas Berishës, krijimi i një komisioni të drejtuar nga Balla lidhet me monitorimin e qëndrimeve të anëtarëve të mazhorancës në rrjetet sociale, me qëllim identifikimin e atyre që nuk kanë mbështetur publikisht qëndrimin e qeverisë ndaj protestave.
Berisha pretendon se Peleshi është një nga personat që mund të preket nga këto zhvillime, pasi sipas tij nuk ka mbajtur qëndrime kundër lëvizjes rinore qytetare. Ai shtoi se zëvendësimi i Peleshit me Ballën mund të ndodhë së shpejti. Berisha e cilësoi lëvizjen rinore si një nga më të fuqishmet që vendi ka njohur që prej viteve ’90 dhe u bëri thirrje demokratëve të marrin pjesë në të si qytetarë, jashtë strukturave partiake. Berisha dënoi çdo ndërhyrje ndaj protestave dhe paralajmëroi se zhvillimet brenda mazhorancës mund të sjellin edhe ndryshime të tjera në radhët e saj.
”Panik, tmerr, frikë në kampin e qeverisë. Krijohet Komisioni Balla. Komisioni Balla është komisioni që po kontrollon statuset në mediat sociale të nomenklaturës, për të identifikuar ata, të cilët nuk kanë bërë statuse kundër lëvizjes rinore qytetare dhe flamingove pra. Viktima e parë e Komisionit Balla do jetë Niko Peleshi, i cili sipas Ballës, është treguar sylesh ndaj lëvizjes rinore qytetare dhe nuk ka statuse në mediat e tij kundër tyre. Pritet zëvendësimi i shpejtë i Peleshit me Ballën, laj e thaj, Balla i ka mbetur atij. Me kryetarin e komisionit të vëzhgimit të rrjeteve sociale të nomenklaturës socialiste. A do ketë viktima të tjera? Do ketë, por ato janë pa emër, pa pasojë, ndaj dhe nuk ia vlen fare t’i përmendësh”,-tha Berisha.
Burime nga PS thanë se këto lëvizje janë në psikofantazinë e Saliut por jo në realitet.