Kryeministri Edi Rama komentoi dhe reagimin e Ministrisë së Jashtme të Greqisë ku kërkohej hetimi i situatës së krijuar në Zvërnec, pasi një shtetas grek mbeti i lënduar, i cili u cilësua në reagim si pjesë e minoritetit grek në Shqipëri.
“Për herë të parë, dje dëgjova se në Zvërnec paska një popullsi homogjene greke. Këtë nuk e kisha dëgjuar ndonjëherë, ndoshta sepse jam injorant. U mahnita nga deklarata e Ministrisë së Jashtme të Greqisë.
Ishte një akt dhune, por jo një akt dhune shtetërore, siç ka ndodhur me shqiptarët në burgjet e Greqisë, apo siç ka ndodhur më parë edhe me shqiptarë në rrugët e Greqisë.
Që të ndodhë një akt dhune nga një grup rojash private dhe të ngrihet një shtet në këmbë për të nënvizuar etninë e protestuesit, kjo është diçka që, sipas meje, nuk i shërben marrëdhënieve tona, të cilat sot janë sërish në ditët e tyre më të mira.
E përmenda këtë sepse dua të them se pretendimet janë legjitime, por ato zgjidhen në gjykata. Titujt e pronësisë janë baza e çdo veprimtarie dhe jo pretendimet. Siç ndodhi edhe në Rrjoll, ku toka ishte blerë nga pronarët që dispononin dokumentacionin përkatës, ndërsa disa të tjerë ishin vetëm pretendues.
Vendi nuk mund të zhvillohet nëse mbetet pezull mes titujve të pronësisë dhe pretendimeve, pas gjithë katrahurës që kemi trashëguar”, tha Rama.