Sesioni i ri parlamentar nis më 19 janar, dhe kryetari i Kuvendit ka bërë gati një plan veprimi të institucionit që drejton, duke marrë parasysh edhe rekomandimet e KE-së. Niko Peleshi synon të rrisë dialogun politik. Sjellja e deputetëve jo pak ka shqetësuar mazhorancën qeverisëse, prandaj Peleshi mendon se ka ardhur koha për të ndryshuar Kodin e Sjelljes që lidhet me takimet e deputetëve apo lobimet. Gjithashtu, ai mendon se deputetët kanë nevojë për “leksione” periodike për t’u njohur me rregullat e sjelljes.
As në këtë sesion të ri nuk do të mungojnë masat disiplinore ndaj “rebelëve” që thyejnë rregullat. Për shkak të përjashtimeve, 6 deputetë demokratë nuk do të arrijnë të jenë në seancën e së hënës, pasi u dënuan në dhjetor me 30 ditë pune.
Me planin e veprimit të tij, Niko Peleshi i kërkon Kuvendit që të rrisë kontrollin ndaj qeverisë, nëpërmjet interpelancave, pyetjeve dhe mocioneve me debat. Një platformë që nga shtatori në dhjetor, nën drejtimin e tij, nuk funksionoi. Si kusht i Brukselit, Peleshi vë theksin se Kuvendi do të jetë transparent, ndërsa pritet të ndërtohet platforma online ndërinstitucionale.
