Shefi i Urgjencës në Spitalin e Traumës ka konfirmuar se pavarësisht paraqitjes së protestuesve, efektivëve të policisë dhe kalimtarëve për ndihmë mjekësore, nuk ka asnjë pacient të intubuar apo humbje jete, duke hedh poshtë edhe pretendimet që po qarkullojnë në rrjete sociale. Në një deklaratë për mediat, ai bëri me dije se dëmtimi më i rëndë i regjistruar është një frakturë e kërcirit të djathtë, e cila do të trajtohet sipas procedurave mjekësore.
“Gjatë pasdites së sotme, në Spitalin e Traumës janë paraqitur për të marrë ndihmë mjekësore protestues, efektivë policie dhe kalimtarë. Dëmtimi më i rëndë është një frakturë e kërcirit të djathtë që do të trajtohet sipas procedurës. Ritheksoj që nuk ka asnjë pacient të intubuar dhe asnjë humbje jete”, tha shefi i Urgjencës.
Sa i përket të riut që pësoi frakturën në këmbë, shefi i Urgjencës sqaroi se ai është transportuar në spital në gjendje të stabilizuar, pasi ka marrë ndihmën e parë në terren nga ekipi i urgjencës.
“I riu ka mbërritur në gjendje stabël në spital. Nga ana e 127-s është bërë imobilizimi në terren. Tek ne ka ardhur në gjendje të stabilizuar. Ndihma e parë është dhënë nga ekipi ortoped dhe djali po plotësohet me të gjitha ekzaminimet e tjera dhe është për ndihmë në ortopedi”. I riu po vijon ekzaminimet e nevojshme, ndërsa trajtimi i tij do të kryhet nga shërbimi i ortopedisë.
